Në kuadër të përmbylljes së projektit “Fuqizimi i Shëndetit dhe Mirëqenies: Mini-Laboratorë
të Angazhimit në Punë për Personat e Rritur Jetimë me Aftësi të Kufizuara”, Shoqata
organizoi takimin përmbyllës me stafin multidisiplinar dhe vullnetarët e përfshirë. Takimi u
fokusua në vlerësimin e rezultateve, reflektimin mbi procesin e zbatimit si dhe përcaktimin e
hapave të ardhshëm.

Pikat kryesore të takimit
• Prezantimi i progresit: Koordinatorja e projektit, Suela Ndoja, paraqiti një analizë të
detajuar të zhvillimit të mini-laboratorëve dhe ndikimit të tyre te të rinjtë pjesëmarrës.
• Vlerësimi institucional: Drejtuesi i Shoqatës, Luigj Mila, falënderoi stafin dhe vullnetarët
për përkushtimin e treguar dhe theksoi rëndësinë e bashkëpunimit në garantimin e cilësisë së
aktiviteteve.
• Reflektime nga terreni: Stafi dhe vullnetarët ndanë përvoja konkrete nga puna me të rinjtë,
duke evidentuar përmirësimin e aftësive praktike, rritjen e ndërveprimit dhe motivimin e lartë
gjatë aktiviteteve.
• Sugjerime strategjike: U propozuan hapa për zgjerimin e projektit, përfshirë krijimin e
moduleve të reja praktike dhe forcimin e partneriteteve me institucionet e punësimit dhe
komunitetin lokal.

Mini-laboratorët praktikë të zhvilluar gjatë projektit
Gjatë fazës së zbatimit, projekti ka krijuar dhe zhvilluar katër mini-laboratorë praktikë, të cilët
synuan rritjen e aftësive profesionale dhe krijuese të të rinjve:
• Pirografi
• Kopshtari
• Artizanat
• Punime krijuese/ekspresive

Në fillim të projektit u përfshinë 49 persona me aftësi të kufizuara, të cilët morën pjesë në
seancat fillestare të vlerësimit. Pas një procesi të detajuar të vlerësimit të aftësive dhe
kompetencave, u përzgjodhën 25 të rinj, të cilët u ndanë sipas mini-laboratorëve përkatës, duke
u ofruar mbështetje të personalizuar dhe aktivitete të përshtatura me kapacitetet e tyre.

Rezultatet kryesore të projektit

1. Rritje e vetëbesimit dhe motivimit: Pjesëmarrësit treguan përmirësime të dukshme në
angazhim, komunikim dhe marrje iniciative.

2. Zhvillim i aftësive për përfshirje në komunitet dhe treg pune: Mini-laboratorët kanë
ndihmuar në formimin e aftësive praktike, organizative dhe sociale të të rinjve.

3. Stimulim i pavarësisë: Të rinjtë kanë përfituar nga programe të orientuara drejt aftësive
të jetës dhe rritjes së autonomisë personale.

Mbështetja
• Projekti u realizua falë mbështetjes së Credins Foundation, si dhe angazhimit të partnerëve
dhe bashkëpunëtorëve që kontribuan në çdo hap të tij. Mirënjohja jonë e sinqertë shkon për të
gjithë mbështetësit që besuan në misionin tonë.

Përfundim
• Së bashku po ndërtojmë ura drejt një shoqërie më gjithëpërfshirëse, më të drejtë dhe më
të fuqizuar për të gjithë të rinjtë me aftësi të kufizuara.